Arkivi Qendror Shtetëror i Drejtësisë drejtohet dhe përfaqësohet ligjërisht në marrëdhënie me të tretët nga drejtori, i cili përgjigjet para ministrit për administrimin, menaxhimin dhe funksionimin e përgjithshëm të institucionit, si dhe cilësinë e efektivitetin e veprimtarisë së tij.

Drejtori i AQSHD-së ushtron kompetenca dhe kryen detyrat, si më poshtë vijon:

• Organizon, drejton dhe kontrollon veprimtarinë e përditshme të institucionit;
• Bashkërendon veprimtarinë e institucionit me organet shtetërore nga varen fondkrijuesit për zbatimin e detyrave të ngarkuara;
• Kërkon nga fondkrijuesit informacion për zbatimin e dispozitave që rregullojnë veprimtarinë e shërbimit arkivor për dokumentet e tipologjisë dhe ushtrimin e funksioneve të ngarkuara;
• Kryeson dhe përfaqëson në marrëdhënie me të tretët Komisionin Epror të Ekspertizës, të ngritur në përputhje me legjislacionin në fuqi;
• Miraton rregullat e punës metodike arkivore me njësitë e ruajtjes së dokumenteve të tipologjisë që krijohen dhe administrohen në rang vendi;
• Miraton formatin dhe përmbajtjen e regjistrit shkresor dhe elektronik të fondit arkivor me njësitë e ruajtjes së dokumenteve të tipologjisë që administron;
• Miraton për vitin pasues, në përputhje me kriteret e përcaktuara, programin e punës së institucionit ku përcaktohen dhe planifikohen:
  • objektivat, detyrat dhe prioritetet, në përputhje me objektivat strategjikë afatgjatë të sektorit për administrimin efektiv dhe efikas të trashëgimisë tipologjike gjyqësore dhe hetimore;
  • veprimtaritë e kontroll-verifikimit, në përputhje me vlerësimin e riskut për transferimin dhe dorëzimin e njësive të ruajtjes RHK prej fondkrijuesve, sipas parashikimeve dhe afateve të përcaktuara nga lista TIP dhe listat konkrete të çdo institucioni;
•  I propozon për miratim Këshillit të Lartë të Arkivave normat tekniko-profesionale dhe metodologjike të shërbimit arkivor për dokumentet e tipologjisë gjyqësore dhe hetimore;
• I propozon për miratim ministrit rregulloren e brendshme organizative që përcakton metodat e punës dhe sjelljen e personelit;
• I paraqet ministrit raportin e përgjithshëm vjetor të veprimtarisë së institucionit;
• Kryen detyra të tjera të parashikuara nga legjislacioni në fuqi për arkivat, për organizimin e funksionimin e administratës shtetërore apo të ngarkuara nga ministri.